Nurjannah Usman

Jak beut

GEMA JUMAT, 04 AGUSTUS 2017

Oleh: Nurjannah Usman
Assalamualaikum loen pu phoen nazam
Saleum keu rakan ubeut ngoen raya
Nibak awai phoen tapujoe Tuhan
Seulawet rijang akan Saidina

Cicem tiong jipoe lam awan
Cicem kuangkhang didalam cintra
Jinoe takisah ta cuba karang
Taikoet reusam jak beut sikula

Ujeun jitoh hana jipirang
Ureung jak u blang musem seumula
Aneuk miet cut-cut pike hai taulan
Tayu seumbahyang peudong agama

Jiteumoh naleung ditanoh lapang
Jak peulheh layang wate uroe kha
Sikula beuna jak beut bek leukang
Nyan keuh amalan aneuk miet beuna

Asai koh pade musem jak u blang
Geutanyoe rakan seunang lagoina
Aneuk miet jak beut seuroh beurijang
Bek lalou bubayang tv di buka

Oh wate mugreb ta yue sembahyang
Meunan syit rakan bak wate isya
Teuma oh suboh manteng supot klam
Yue bedoh rijang pujoe Rabbana

Beu sabe ingat uroe ngoen malam
Nyan ta amalkan peurunoe sigra
Tugas geutanyoe nasihat rijang
Jeut keu amalan teuma oh raya

Sembahyang luhoe kadang na sajan
Yue bedoh rijang walau hek lagoina
Teuma oh supot asa katrok jan
Jak tueng ie sembahyang pujoe Rabbana

Jak beut pih beuna sikula bek tham
Keu anek sayang tajok agama
Tajok bak guree geuyu beut Quran
Meunan syit amalan kitab dibaca

Dibaca kitab hukom jipaham
Lheh nyan ditunaikan oh wate raya
Oh jih karayeuk hateu teuh senang
Karena amalan bekai jikana

Meumada oh no wareh ngoen taulan
Suai amalan ke aneuk dumna
Tamedoa bak sidroe Tuhan
Geutanyoe rakan beu tamong syurga

Neuhen, 3 Agustus 2017

comments

Post Author: Nurjannah Usman