Teuingat keu Syuhada Tsunami

Teuingat keu Syuhada Tsunami

GEMA JUMAT, 29 DESEMBER 2017

oleh: H. Ameer Hamzah:

Kru seumangat rahmat meulimpah
Deungo lon peugah na saboh rawi
Watee tsunami geubri le Allah
Rakyat barollah geuwoe bak Rabbi

Lhee reutoh ribee angka geupeugah
Aceh musibah geumpa tsunami
Imuem masjid raya pihna nyang tewah
Kheundak Poteu Allah khaliqulbahri

Allahummaghfi rlahum bandum lon peutroh
Do’a lon sunggoh keu droe neueh akhi
Seumoga Allah deesya geu sampoh
Lam syuruga beuroh teumpat nyang khali

Ka lhee blah thon tanyoe ka jeuoh
Guree dum katroh u alam barzahi
Kamoe di donya siat geutanggoh
Tapreeh watee troh bak Allah janji

Tgk. H. Sayed Ridhwan imum nyang patoh
Ya Allah beuroh u dalam jannatul Firdausi
Bersama keluarga geuwoe ka jeuoh
Do’a lon beutroh e ya Ilahi

Tgk. H. Hasanuddin Hasyim bacaan that roh
Juara ka tumboh lam musabaqah tingkat ‘ali
Ngon keluarga cit bandum ka jeuoh
Wahe rakan beh doa tanyoe bri

Tgk. H. Azhari Usman imum that qari
Hate teuh leupie watee ta deungo
Beserta keluarga geuwoe bak Rabbi
Keuong tsunami 13 thon lampoe

Seulaen imum nyang keunong tsunami
Na Cit hai akhi muazzin geutanyoe
Ustaz Yahya AR Direktur TPQ
Keunong tsunami bak Allah geuwoe

Masjid Raya ceudah han sakri
Payong meuriti di leuen masanyoe
Mumada ohnoe haba ulon bri
Peuigat akhi kadang ka tuwo

Baiturrahman, 26 Desember 2017

comments

Comments are closed, but trackbacks and pingbacks are open.