Bek Mubazir

Bek Mubazir

GEMA JUMAT, 1 JUNI 2018

Oleh : Nurjannah Usman

 

Assalamualaikum kawoem sinaro

Yang na lam sagoe atawa kota

Haba tasambong galom seuluso

Suai deuk-deuk troe buleun puasa

 

Boh kaye musem rata jeut sago

Hana seuluso taseubot nama

Boh drien pih musem jibouh lam puto

Hana syit rugo wate puasa

 

Meunan timon wah rata ji publo

Han kendoe adoe ie muda teuma

Jimeukat tubee jiweng ngoen jaroe

Nyan pih han rugoe lagot leumpah na

 

Na meukat cundoi lam kaca kedro

Jitem syit jak blo yang na selera

Meukat mie caluk geboh ngoen jaro

Rame duem yang bloe nyang duek di Banda

 

Kueh merentang aduen ngoen adoe

Na meukat risol bakwan sereta

Ruti sile meu macam asoe

Hana syiet tuwo timphan asoe kaya

 

Nyang meukat cane hansep ureueng blo

Menan syiet adoe bingkang meu keuba

Na syit nan poding yang meukat cupo

Di ureueng meu blo geu sawiet sigra

 

Hana geupike pu duem geujak blo

Nyangna syiet rugoe mubazir be na

Wate meu buka mugreb ka sampoe

Ie u lam jaroe troe lempah na

 

Abeh duem tinggai harta ka rugoe

Bak eh ka tuwo makanan sisa

Bek peu turot meunan hai adoe

Syaitan nyang peutoe tanyoe digoda

 

‘Oh wate uroe mandum beu tablo

Wate kasampoe han le ta hawa

Leubeh got tajok keu ureueng deuk-deuk tro

Tanyoe han rugoe sedekah pih na

Neuhen, 30 Mei 2018

 

 

 

 

 

 

 

 

 

comments

Comments are closed, but trackbacks and pingbacks are open.