Masjid Raya

Masjid Raya

GEMA JUMAT, 29 JUNI 2018

Oleh : Nurjannah Usman

Assalamualaikum saleum tasambong
Watee loen puphoen panton tarika
Keu ureueng agam atawa nyang inong
Keunong han keunong lewat udara

Treb ka lawet dalam meu sareng
Tan loen bri saleum saweu saudara
jino trok masa wahe eu bungoeng
Hai teungku inoeng tasambong haba

Tajak u Banda na simpang limong
Rap tubiet tamong geujak belanja
treb ka masa haba meusareng
Jinoe uloen kheun bhah Masjid Raya

Nyang dari gampong leumpah meukeunong
Aneuk ngoen inoeng geu mee u Banda
Adak hana peng peusewa umong
Nyang penteng inoeng hate lam suka

Wate geu neuk jak geu atoe carong
Langkah phoen keunong u Masjid Raya
Leumpah that suka syiet brat meukeunong
Barokon rakan kaloen bak gamba

Langkah pih katrok hana le bingong
Barouh ngoen tunong geu kalon rata
Rap barouh lagak meureuntang payong
Tunoeng hai kawom payong pih sama

Jak tueng ie seumbahyang hate meukenong
Dibawah payong baseman nama
Geutroen ngoen tangga blah ureueng inoeng
Geut that meukenong gleh meu lumpah na

Rata jeut sagoe lagak ban buleun trang
Ureueng seumbahyang ku’syuk teurasa
dikeu menara lagak dengoen trang
Lom peumandangan bungoeng seulingka

Barat ngoen timue hana ngoen bandeng
Lagak that meusyen sitentang mata
Ureueng teu duek-duek dimiyuep payong
Na syiet meu untong ngoen keluarga

Dikeu masjid kolam meu reuntang
Leumah bubayang nyan Masjid Raya
Wate geut buleun purnama peu trang
Lagak hana ban jibeudoh cahaya

Haba han abeh walau loen peutrang
Nyan pemandangan di Masjid Raya
Menyo hai tengku bit penasaran
Neujak neu peutrang u kuta Raja

Meumada ‘oh no panton kiasan
Haba loen karang loen reka-reka
Peu meuah uloen nyo na kesalahan
Suai karangan galom biasa

Neuhen, 28 Juni 2018

comments

Comments are closed, but trackbacks and pingbacks are open.