Aneuk Dara

Aneuk Dara

GEMA JUMAT, 28 SEPTEMBER 2018

Oleh: Nurjannah Usman

 

Assalamualaikum nyak bintang timu

Nyang na bak dapu yang baca Gema

Jinoe takisah haba tameusu

Suai nyak bungsu yang dara-dara

 

Langet yang manyang suum that abu

Abeh dum layu tanaman teuka

Haba taintat dara tan malu

Abeh dibahue le agam buya

 

Le nyang leupah buet hana jitupu

Malee ngoen abu atau ngoen nyakwa

Asai trouk hawa syaitan yang rayu

Duem ji peulaku tan takot dosa

 

Allah ya Rabbi oya Tuhan ku

Malee ngoen ilmu agama hana

Sayang keu poma nyang kira bi bu
Ijih hai Abu lalee meu cinta

 

Sikula tanle beut pih tan bak teungku

Laloe ngoen rindu keu abang Jaka

Hana di malee asai trouk nafsu

Allah Tuhanku peu sadar hamba

 

Sayang takaloen dara nyak meulu

Bee hana le meulue bungong kamala

Han soe teujeut tham kameunan laku

Donya ka syahdu tan so bela-membela

 

Jiduek honda sang ngoen ayah si Abu

Nyan meunan laku peu leumah rata

Rame nyang kaloen watee geu lalu

Larang tan lee sue nyang tuha-tuha

 

Tapekong adat Islam bak teungku

Lagee nyan laku teugah beu rata

Beu mandum saree jaga nyak meulu

Walau koen syahra ku atawa syahra ma

Asai yang Islam meu bek taragu

Nyak bungoeng meulu teugah beu sigra

Menyoe han jipateh larang deungoen su

Cok awee laju seupot beu sigra

 

Lagak-lagak tiong jie meusu

Walau pih syahdu teutap lam cintra

Menyoe na salah wate loen meu su

Poma ngoen Abu meu’ah beu sigra

 

Neuhen, 27 September 2018

 

 

 

 

 

 

 

comments

Comments are closed, but trackbacks and pingbacks are open.