GEMA JUMAT, 3 AGUSTUS 2018

Oleh: Nurjannah Usman

Langet nyang manyang awan meuhimpon
Taeu nanggroe loen lagak leumpah na
Ie krueng dilee lagak meu aloen
Ureueng meuhimpoen teu duek meu banja

Jinoe hai cutda taci meu aloen
Keu suai panton cuba calitra
Keu panorama nanggroe di uloen
Lagak ban rihoen jeut jak tamasya

Dipusat kota mesjid santoen
Nyang peugot phoen Iskandar Muda
Raja nyang meugah di Aceh ampoen
Nyang keuh nanggroe loen Aceh nyang raya

Meugah ie terjun Blang Kolam dek Ton
Ureueng jak tiep thoen Aceh Utara
Na syiet ie terjun di desa Suhom
Kecamatan Lhong di Aceh Raya

Pantai Lampuuk Lhoknga pih rawon
Lagak dan santoen tapandang mata
Hana geu tuwoe Ulee Lheue ujoeng
Pelabuhan langsong sabang ngoen Banda

Leumpah that lagak taeu di ujong
Mata uroe troen ‘oh supot teuka
Pulau Rubiah troek Jak meurawon
Ubena kawom troek nanggroe luwa

Hana tatuwoe tajak meupantoen
Museum tsunami tempat syuhada
Leu that nyang korban troek umu sithoen
Hana soe jeut troen peu seulamat nyawa

Na syiet Gunongan di Aceh rihoen
Tempat meuhimpoen ratu ngoen raja
Na rumoh Aceh lengkap ngoen anjong
Mangat taek troen lagak that rupa

Hana lom tuwoe jinoe hai ampon
Tanoeh nyang lambong lagak pesona
Meutamah kurma geupula lam kebon
Barbate ampon geu seubout nama

Han abeh-abeh menyoe ta sambong
Pesona Aceh loen tanoh tercinta
Meumada ‘oh noe laen tasambong
Allah geu lindong laen jan meurumpok teuma

Neuhen, 26 Juli 2018

comments
Do NOT follow this link or you will be banned from the site!