Bek Meupake

GEMA JUMAT, 4 MEI 2018

Oleh : Nurjannah Usman

 

Ranup silaseh meugah di Aceh

Pue lom Pulo Weh di Sabang pih na

Haba tasambong sang ta peujadeh

Meubek na bengeh rakan yang baca

 

Malam that supot buleun hana deuh

Adak ta jingeuk padek tan cahya

Jinoe prohaba wahe eu wareh

Ureung meupakee na yang meudawa

 

Wahe eu rakan yang hate peudeh

Meu bek peujaeh peutimang haba

Yang hate mumang bek tapeu leubeh

Aleh pue aleh tanyoe meu senda

 

Dum le takalon haba duem lubeh

Didalam medsos atawa nyata

Ureueng meu pake dawa peu jadeh

Bak warong kupi kadang hai mawa

 

Meupake karue geu adu aleh

Kadang apa Yeh bak pajoe bada

Ka geumeudawa caleg yang lubeh

Payah tiek aleh jaroe bak dada

 

Na nyang meupake gara peng receh

Han sep tan lubeh ka kureung teuma

Wate tapikee hate teu peudeh

Sang-sang uroe jeh aman leumpah na

 

Jinoe geutanyoe that bagah beungeh

Kadang meusenda kajet keudawa

Syaitan digoda tanyoe han jiweh

Yang penteng jadeh karue beu subra

 

Allahu Rabbi donya rap reuloh

Rata jeut sagoe karue meu jeumba

Na nyang beh nyawong istri peu abeh

Tan jituri le salah ngoen bena

 

Yang penteng nafsu ijih beu asee

Walau peuabeh korban keluarga

Ulee jih ka kreuh ka tutop hatee

Tan jidengoe le haba yang beuna

 

Meumada ‘oh noe wahe eu wareh

Haba ka abeh keu suai subra

Yang peunteng Gema taba sajan eh

Baca beu abeh walau ka jula

 

Neuhen, 03 Mei 2018

 

comments
Do NOT follow this link or you will be banned from the site!