Geunap Peuet Blah Thon Teuka Tsunami

GEMA JUMAT, 21 DESEMBER 2018

Oleh: Basri A Bakar:

Alhamdulillah seugala puji

Tuhanku Rabbi nyang Maha Esa

Seulaweuet saleuem kepada Nabi

Ureung peuturi salah ngon beuna

 

Subhanallah wa bihamdihi

Maha that suci Allah Ta’ala

Deungon bismillah kisah lon rawi

Suai tsunami ulon calitra

 

Geunap peuet blah thon teuka tsunami

Bala Tuhan bri luar biasa

Dua ribee peut wahe e akhi

Keunang kembali wahe syedara

 

Allah peuingat mungken buet keuji

Le that buet ‘ashi tanyoe keurija

Ladom ceumeucue ladom meujudi

Ladom korupsi galak meuzina

 

Peunyaket baro jinoe terjadi

Bak warong kupi sinan meudoda

Hana beda le Aceh ngon Bali

Masjid sunyi jamaah hana

 

Teungoh su azan wahe e akhi

Lam warong kupi geubedoh hana

Sinan meutumpok conek ngon wifi

Mata bak tivi nonton beurita

 

Padahai tanyoe ureueng islami

Malee han sakri ngon ureueng lua

Seuramoe Mekkah Aceh jituri

Syari’at Nabi tanle soe jaga

 

Bekle tapubuet mungkar ngon keuji

Lagee yue Nabi meubek na dawa

Bekle taundang bala terjadi

Bala tsunami jilid keu dua

 

Neubri ya Allah korban tsunami

Surga tinggi neuampon dosa

Kubu beulapang Allah beuneubri

Watee bak titi seulamat beuna

 

Mumada ‘ohnoe haba lon rawi

Geulantoe kupi dua krak bada

Nyang tuleh panton ulon Basri

Meuah beuneubri bek jeuet keu dosa

Lamgugob, 20- 12- 2018

comments
Do NOT follow this link or you will be banned from the site!