Jak beut

GEMA JUMAT, 13 MARET 2020

Oleh : Nurismi

Mula awai phoen salam ‘alaikum
Kepada kawom pembaca gema
Wate neu baca kadang neu peu phoem
Wareeh ngoen kawom dalam media

Di langet manyang ujeun Neu peutroen
Dalam nanggroe loen Aceh nyang raya
Haba loen peugah laen loen sambong
Jak beut hai kawom tuha ngoen muda

Tapajoeh ranup ie babah ji troen
Pajoeh on murong ubat corona
Leu that nyang beo didalam gampoeng
Tuha tan muphoem meu beut aleh ba

Dari phoen ubet didalam ayoen
Seulaweut geu sambong yu beut bek lupa
‘Oh wate rayeuk ka doek duem kawoem
Jak beut tan muphoem laloe ngoen donya

Wahe eu rakan didalam gampoeng
Tanyoe bek le mbong walau katuha
Wajeb tajak beut menyoe tan muphoem
Meurunoe beu mephoem hukom agama

Han pue tamale tapeutimang mbong
Menyoe dikawom ileume hana
Didalam hudep wajeb hai kawom
Jak beut beu muphoem sampe ‘oh tuha

Meurunoe kitab bhah dalam gampoeng
Bhah wudhu’ kawom bek gura-gura
Bhah tameu suci meunan beu meu phoem
Ghibah lam gampoeng peugadoeh sigra

Bhah ta ibadat cara ngoen rukon
Meunan syiet kawoem hukom keluarga
Bek le meulale laloe ngoen peng on
Donya nyoe kawom katoe ngoen fana

Beudoh meununtut hai teungku ampon
Seugala rukon ileume beuna
Wate tapubuet suruhan Rabbon
Tanyoe ka muphoem han sia-sia

Neuheun, 12 Maret 2020

Tinggalkan Balasan

Alamat email Anda tidak akan dipublikasikan. Ruas yang wajib ditandai *