PEURINTAH SHALAT BEUNA TAJAGA

GEMA JUMAT, 13 MARET 2020

Oleh : Tgk. H. M. KasimYahya, S.Ag

Alhamdulillah pujoe Hadarat
Nyang bri beureukat geutanyoe hamba
Hudep lam donya neubri hidayat
Uroe akhirat neubri syuruga

Seulaweuet saleuem keu Nabi Muhammad
Nyang bri syafaat di Padang Mahsya
Rasul peuturi tentang syariat
Mangat seulamat hudep seujahtra

Deungon bismillah lon puphon surat
Nyoe buleuen Rajab sangat mulia
Lagee meusubot di dalam kitab
Meunan riwayat alim ulama

Beule tabaca hai rakan sahbat
Istighfar rajab rayek that pahla
Kadangna tuwo ulon peuingat
Keu bandum ummat tuha dan muda

Dua ploh tujoh bak buleuen Rajab
Israk dan Mikraj Nabi Mustafa
Neujak meureumpok deungon Hadharat
Bak saboh teumpat di ‘Arasy ‘Ulya

Hasil dialog deungon mupakat
Perintah shalat keupada hamba
Di dalam Hadis Nabi amanat
Geutanyoe ummat wajeb keurija

Sibeurangkasoe han jitem shalat
Uroe akhirat asoe nuraka
Pura hana thee trok watee shalat
Peugot sangkilat sampe an tuha

Mulai jinoe beule ibadat
Mulai phon shalat lheuhnyan puasa
Menyo na mampu tabayeue zakat
Haji beurangkat nyona kuasa

Bandum amalan singoh geuhisab
Ibadah shalat awai phon mula
Bandum geutanyong uroe akhirat
Oleh hadarat Maha Kuasa

Nibak buleuen nyoe wahe e sahbat
Ka jeuet keu adat apam seudia
Khanduri apam di Pidie meuhat
Geusambot Rajab meumacam cara

Tapi nyang salah mantong maksiat
Perintah shalat hana keurija
Jinoe bek lale beudoh ta taubat
Deugon Hadharat meubek le dosa

Di Indrapuri meugah boh langsat
Mameh dengan klat meujampu rasa
Meumada ‘ohnoe haba peu ingat
Beuna manfaat soe nyang tem baca

Lamgugob,10 maret 2020

Tinggalkan Balasan

Alamat email Anda tidak akan dipublikasikan. Ruas yang wajib ditandai *