Beut Kitab Kuneng

GEMA JUMAT, 4 OKTOBER 2019

Oleh:  Nurjannah Usman

Alhamdulillah loen pujoe Rabbon

Panton loen pu phoen saweu saudara

Panton loen karang hai teungku ampon

Nyoe hana meuphom me’ah beuraya

Meugah di Sawang na tutue ayon

Meugah Lhok Sukon jembatan dua

Haba loen kisah kitab lam panton

Muphom han muphom taulang baca

Dari youh ubeut dile digampong

Masa geu ayon ka oleh poma

Teuma ‘oh lheuh nyan dudoe tasambong

Wate rayeuk loen jok beut sikula

Geujak jok bak beut mukaddam pu phon

Kitab na diloen gure yu baca

Geubaca kitab akhlak geu puphon

Mangat jeut diloen beuna etika

Dudoe geusambong wate trok bak thon

Kitab kuneng langsong hukom agama

Ubena surah kota ngoen duson

Mandum mehimpon fikih tabaca

Cara sembahyang nyang hana muphom

Lop kitab langsong surah tabaca

Cara puasa ngoen pubuet rukon

Mandum na hukom wate tabaca

Asai beujemot baca uram ngoen ujong

Nyang hana muphom teungku nyang baca

Geu surah kitab hukom ngoen rukon

Mangat rakan loen ibadah beuna

Ubena dausa yang hana ampon

Wahe adek lon nyang muda-muda

Dausa hana beut didalam gampong

Menang syit kawom yang na dikota

Tabeut beujemot tamita hukom

Na pat tamelindong hudep lam donya

Segala amalan atau buet rukon

Ileme langsong payah tamita

Nyan kitab kuneng meutamon hukom

Beuna adek loen jemot tabaca

Hanapue lale taduek lam gampong

Donya ka ujong kiamat teuka

Dicong bak mane jimesu tiyong

Kajideng lutoeng dicong bak jangka

Me’ah hai teungku uram ngoen ujong

Bah laen kawom tasambong teuma

Neuheun, 03 Oktober 2019

comments
Do NOT follow this link or you will be banned from the site!